ང་དང་ཕ་ཡུལ།
ཕ་ཡུལ་ལགས།
ངའི་ཚེ་སྲོག་གི་མྱུ་གུ་འཇིག་རྟེན་འདིར་འབུས་པ་ནས་བཟུང་། ཤ་ཁྲག་གདོས་བཅས་ཀྱི་ཕུང་བོ་ལ་ཟུངས་ཁྲག་གི་བཞུར་རྒྱུན་ཆགས་ཤིང་བེམ་ཤེས་ཀྱི་འཕྲོད་སྦྱོར་ལ་རྣམ་དཔྱོད་ཀྱི་བློ་གྲོས་རྒྱས། དེ་ཡང་། མི་ཡུལ་འདིར་བདག་གི་ངུ་ངག་གི་དབྱངས་རྟ་ཐོག་མ་དེ་མཆེད་པ་ནས་བཟུང་། ང་དང་ཁྱོད་ཀྱི་བར་ལ་བརྗོད་ཐབས་བྲལ་བའི་བརྩེ་དུངས་རྣལ་མ་ཞིག་ཤ་དང་རུས་པའི་གསེང་དུ་ཏིལ་ལ་ཏིལ་མར་གྱི་རྣམ་པས་ཆགས་ཡོད།
དེ་ལྟར་བདག་གིས་དུངས་བ་ཟབ་མོ་མིག་གིས་བལྟས་ན། སྐད་ཅིག་ཀྱང་སྡོད་པ་མི་སྲིད་པའི་དུས་ཀྱི་འགྱུར་ཁུགས་ཁྲོད་ནས་ངའི་ཕ་ཡུལ་རྒས་ཀྱིན་འདུག མ་ཟད་གནས་དེར་འཚོ་བའི་མྱི་ཚོགས་ཀྱང་ལེ་ལོ་དང་སྒྱིད་ལུག་གི་ཁྲོད་ནས། གསེར་ལས་དཀོན་པའི་དུས་ཚོད་དོན་མེད་དུ་ཆུད་ཟོས་སུ་བཏང་སྟེ་སྡུག་བསྔལ་གྱི་མཁུན་སྒྲའི་ཁྲོད་གཏུ་མིག་གཉིད་ལས་སད་ཀྱི་མེད་ལ། སྤྱི་ཚོགས་ཀྱི་དཔལ་འབྱོར་འཕེལ་རྒྱས་སུ་སོང་བ་དང་བསྟུན་ནས་ངའི་ཕ་ཡུལ་གཅིག་པུ་དེ་སྐྱ་ཟད་སྔོ་སྡུག་གི་རི་འདབས་ཞིག་ན་སྤྲང་བོ་བཞིན་ཅི་ཡང་མེད་པར་སྡུག་སྡུག་གི་ངང་གནས་འདུག དེར་བརྟེན། ཕ་ཡུལ་དང་ངེད་གཉིས་ཀྱི་བར་དུ་འབྲི་མི་ཚར་བའི་དཀའ་སྡུག་གི་རི་མོ་ཡོད་ལ་བཤད་མི་ཚར་བའི་སྐད་ཆ་མང་པོ་འདུག
གཅིག ཕ་ཨ་ཁུ་ཨ་ནེ་རྣམས་ལ་ཞུ་རྒྱུ།
དེ་རིང་གོ་སྐབས་འདི་བརྒྱུད་ནས་ངའི་ཕ་ཨ་ཁུ་ཨ་ནེ་གཙོ་བྱས་པའི་ཁྱིམ་བདག་རྣམས་ལ་བཀའ་དྲིན་ཆེ་ཞུ་བ་ཡིན། ཉེ་བའི་ལོ་ཁ་ཤས་སུ་ང་ཚོའི་འབྲོག་སྡེ་ཆུང་ཆུང་འདིར་སློབ་མའི་ཁ་གྲངས་ཇེ་མང་དུ་འགྲོ་བཞིན་ཡོད། འདི་ནི་ཧ་ཅང་དགའ་འོས་པའི་དོན་དག་ཞིག་རེད། ཡིན་ཡང་ཁྱིམ་ཚང་ལ་ལའི་ཁྱིམ་ཚང་གི་སློབ་གསོ་ལ་གནད་དོན་ཅུང་ཟད་འདུག ཁྱིམ་ཚང་གི་སློབ་གསོ་ནི་སློབ་མ་ཞིག་ལ་མཚོན་ན་སློབ་སྦྱོང་གི་མཁའ་དབུགས་གཙོ་བོ་ཞིག་ཡིན་ལ། ཕ་མ་ནི་སློབ་མ་དག་གི་དགེ་རྒན་ཐོག་མ་ཡིན་ཙང་། ཁྱིམ་ཚང་ཞིག་གི་ཁྱིམ་ཚང་སློབ་གསོ་དང་ཕ་མ་ཅི་འདྲ་ཞིག་ཡིན་ན་སློབ་མའང་དེ་འདྲ་ཞིག་གི་གནས་སྟངས་ལས་མ་འདས་པ་རྒྱུ་འབྲས་ཀྱི་ཆོས་ཉིད་དུ་ཆགས། རྒྱུ་མཚན་དེས་ཁྱིམ་྄བདག་ཡོངས་ཀྱི་ཁྱིམ་ཚང་གི་སློབ་གསོའི་བྱང་ཚད་རྣམ་པ་ཀུན་ནས་འཐུས་སྒོ་ཇེ་ལེགས་སུ་གཏོང་རྒྱུ་ཤིན་ཏུ་གལ།
༼ཁྱིམ་ཚང་སློབ་གསོ་དང་བུ་ཕྲུག་ལ་ཡིད་ཆེས་བྱེད་པ༽
གཉིས། ཕ་ཡུལ་ཡི་གེ་བའི་སྡེ་ལ་ཕུལ་བ།
ཡུལ་གྲུ་གཅིག་ནས་རིག་པའི་གེ་སར་འཛུམ་པའི་བདག་གི་ཤ་ཉེ་མིང་སྲིང་ཚོ་ལ་ཞུ་རྒྱུ། སྒྲ་ནི་བརྗོད་འདོད་རྗེས་འབྲང་ཕྱིར་ཞེས་པ་ལྟར་ཉིད་ཀྱིས་ཀྱང་དེ་རིང་ཐ་སྙད་སྐམ་པོ་འགའ་བསྒྲིགས་ནས་ཁྱོད་ཚོ་ལ་བློ་དཀར་བོས་སྙིང་གཏམ་ཚ་མོ་ཞིག་བརྩམ་འདོད་བྱུང་། ཤེས་བྱའི་ཆུ་གཏེར་ལས་ཐིགས་པ་ཙམ་ལ་ཞེ་ཚིམས་ཤིང་ཚོར་བ་རླུང་ཁམས་ན་བག་མེད་དུ་རྒྱུ་བ་ཙམ་གྱིས་ཕ་ཡུལ་གྱི་ལས་དབང་འདེགས་ག་ལ་ནུས། ཐ་སྙད་རིག་གནས་ཙམ་སྤྱད་དེ་གཞུང་ལུགས་ཀྱི་དོན་འཁྲོལ་བ་ཡང་སྟོང་བསམ་ཡིན།སྦལ་བ་ན་ཁུང་ནས་བསྡད་དེ་བསམ་པ་གླིང་དཀར་སྟོད་ལ་མི་འཁྱེར་བར་སྨོན་ནོ།།
༼སྨྲ་བ་ཉུང་བའི་ཚུལ་མཐུན་གྱི་མི་ཞིག་བྱེད་པ་གལ༽
གསུམ། གསར་བུ་ལ་ལར་བཤད་རྒྱུ།
ཁྱེད་ཚོའི་ལོ་ཚོད་ལ་བལྟས་ན་གཏམ་གོ་བ་ཅན་གྱི་ཚིག་སྣེ་ཟིན་དུས་དང་མར་རྙིང་ཞད་ཅན་གྱི་ཁ་སྐྱུར་རྟོགས་ཚོད་རེད། སྤུན་ཟླ་ཚོ་ལོ་ཟླའི་གྲིབ་བསིལ་འོག་ནས་ང་ཚོའི་ལང་ཚོ་དང་ལས་འགན་ཚང་མ་བོར་ནས་ཚར་ལ་ཉེ། ཡིན་ཡང་ནམ་རྒྱུན་ཁྱེད་ཚོའི་ཤཱཀྱ་མུ་ནེར་འཕྲད་ན་ཞྭ་མི་ཕུད། གླང་ཆེན་སྨྱོན་པར་ཐུག་ན་ལམ་མི་གཟུར་རབས་དང་། ངེད་ཕ་རྒྱལ་པོའི་འཁྲུངས་རབས་དང་མ་རྒྱལ་མོའི་སྐྱེས་རབས། མགོ་ཐོག་ནས་བྱ་འཕུར་མ་མྱོང་དང་རྐང་ཞབས་ནས་ཆུ་བཞུར་མ་མྱོང་ཞེས་ཁ་རླབས་ཚ་བོ་ཞིག་གསང་མཐོར་བསྒྲགས་པ་ལས་གཞན་གྱི་བྲན་གཡོག་ཏུ་འགྱུར་གྱིན་པ་ཤེས་ཀྱི་ཨེ་ཡོད། དེང་སང་གི་དུས་འདིར་ཆ་རྐྱེན་ལེགས་ཀྱང་ཟས་རིན་མི་དགོས་པའི་གུང་ཟས་ཞིག་གཏན་ནས་མེད། དེའི་ཕྱིར་རང་ཉིད་ཀྱི་སྐེ་རགས་དང་ལྷམ་སྒྲོག་དམ་པོར་བྱོས་ཨང་།
ཁ་ཡ་ན་ཟླ་ཚོ་ཡི་གེ་ནི་སློབ་མ་རྐྱང་རྐྱང་ལ་དབང་བ་ཞིག་དང་སློབ་མ་ཁོ་ནས་སྦྱོང་དགོས་པ་ཞིག་མིན་ཏེ། ཡི་གེ་ནི་ང་ཚོ་ཚང་མ་ལ་དབང་བའི་ཐུན་མོང་གི་རིན་པོ་ཆེ་དེ་ཡིན་པས། ཚང་མའི་རང་ནུས་ཅི་ལྕོགས་ཀྱིས་སྦྱང་རྒྱུ་ཤིན་ཏུ་གལ།
༼ལུས་ལ་རྒྱན་ཆ་ལས་བློ་ལ་ཐོས་པའི་དགའ༽
བཞི། ཕ་ཡུལ་གྱི་བུད་མེད་ཚོ།
མི་ལོ་ཆིག་སྟོང་ལྷག་གི་ཡར་སྔོན་གྱི་ཕོ་མཆོག་མོ་དམན་གྱི་ལྟ་བ་ནག་པོ་དེ། ང་ཚོ་ལ་དབང་བའི་དུས་རབས་འདིའི་ནང་དུ་གནས་ས་ཞིག་ཡེ་ནས་མེད། དེ་རིང་གི་མྱི་ཚོགས་གསར་བ། མཁའ་དབུགས་དང་ཁོར་ཡུག་གསར་བ་། འདྲ་མཉམ་རྩིས་ཐང་གསར་བའི་སྒོ་འབྱེད་ཀྱི་དུས་རབས་གསར་བའི་ལམ་ཁ་འདི་ནས་ཁྱེད་ཚོ་སད་རན་རེད། དུས་རབས་འདིར་ཁྱེད་ཚོ་མཁོ་ལ་ཕ་ཡུལ་ལ་ལྷག་ཏུ་ཁྱེད་ཚོ་མཁོ།
ས་ཁུལ་གཞན་དག་ན་བུད་མེད་ཚོས་སོ་སོའི་ཁེ་དབང་གི་བྱ་བ་དག་ལ་འཛིན་སྐྱོང་གང་ལེགས་བྱེད་ཀྱི་ཡོད་ལ་རང་ཉིད་ཀྱི་འཚོ་བ་རང་ཉིད་ཀྱིས་ཐག་གཅོད་དེ་འདྲ་མཉམ་དང་དྲང་བདེན་གླེང་གི་ཡོད། ཁྱེད་ཚོ་ལའང་འདི་ལྟ་བུའི་ནུས་པ་དབེན་པ་མིན་ཏེ། མ་བཟང་གི་བུ་མོ་ཚོ་སད་རན་རེད་ཨང་།
༼རྨོངས་གཉིད་ཀྱི་འབོད་སྒྲ༽
མཐར་བརྒྱ་བཤད་སྟོང་བཤད་ཚིག་གི་རྩ་བ་ནི་ལ་ཁའི་ཉི་མ་ལྟ་བའི་བདེ་སྐྱིད་ཀྱི་ཆེད་དུ་རང་ཉིད་ཀྱི་མི་ཚེ་སྟོང་ཟད་དུ་མི་གཏོང་དང་། དུས་གཏན་དུ་དངོས་པོའི་ཐོག་ཏུ་དབུལ་བོར་གནས་མི་རུང་ལ་བསམ་པའི་ཐོག་ཏུ་དེ་བས་ཀྱང་དབུལ་བོར་གནས་མི་རུང་ངོ་།།
ཆོས-མྱིང་མེད།
